დაარსებიდან, 1936 წლიდან, საქართველოს ფოლკლორის სახელმწიფო ცენტრის მიზანია ქართული ფოლკლორის ნიმუშების შეკრება, დამუშავება, მოვლა-დაცვა, კვლევა და პოპულარიზაცია; ხალხური შემოქმედების კოლექტივებთან მჭიდრო კონტაქტი, მათი რეპერტუარის დახვეწა-გამდიდრება; ტრადიციულის, მივიწყებულის, დაკარგულის აღდგენა-გაცოცხლება და მისი შემქმნელი ხალხისთვის უკან დაბრუნება; გამოჩენილი მომღერლის, ლოტბარების, მოცეკვავეების, ქორეოგრაფების, ხალხურ მთქმელთა, გამოყენებითი ხელოვნების ოსტატთა შემოქმედებითი ბიოგრაფიებისა და სხვა დოკუმენტური მასალების მოძიება, სისტემატიზაცია და საარქივოდ დამუშავება...

ფოლკლორის სახელმწიფო ცენტრი, ავთენტიკურობის დაცვით, აგრძელებს
დაწესებულების სამოცდაათწლიან ტრადიციას თანამედროვე ხედვით, კომუნიკაციებით, დათვალიერება-ფესტივალებით, უახლესი  ტექნოლოგიებით.

ახლად დაარსებული ფოლკ რადიო, ფოლკლორის სახელმწიფო ცენტრის მთავარი პრიორიტეტებიდან გამომდინარე, ყოველ ორშაბათს 18:00სთ-ზე მუსიკალური წამყვანი ნინო ჭალისური ფოლკლორის სახელმწიფო ცენტრის სპეციალისტებთან ერთად, განიხილავს ცენტრის მიერ განხორციელებულ პროექტებს: ფესტივალ-დათვალიერებებს, სემინარებს, ექსპედიციებს, მოძრავი ხმის ჩამწერი სტუდიის მიერ ჩანაწერებს, გამოცემებს, პრეზენტაციებს, საუბარ-კონცერტებსა თუ სხვა სიახლეებს.

ორშაბათობით, 18:00 სთ-ზე, უსმინეთ ფოლკ რადიოს ნინო ჭალისურთან ერთად. გაეცანით  ფოლკლორის სახელმწიფო ცენტრის საქმიანობასა და სამომავლო გეგმებს.

ფოლკლორის სახელმწიფო ცენტრი ქართული ფოლკლორის სამსახურშია.